Familiane til Moland og French har lenge kritisert norske styresmakter for å ha gjort for lite i saka. Moland føler at trykket på kongolesiske styresmakter er større no.
– Vil følest bittert
– Skulle det skje no vil det samstundes vere litt bittert. Då vil det vise seg at det ikkje har vore tungt nok skyts inne frå norsk side tidlegare, seier ho.
Sonen Tjostolv vart funne død på cella 18. august.
Tysdag skulle rettssaka mot Joshua French ha starta i Kongo. French står tiltalt for å ha drepe kameraten Tjostolv Moland.
Rettssaka vart utsett på grunn av elendig tolking mellom engelsk og fransk. I retten tysdag vart Dagbladet sin tolk oppnemnt som offisiell tolk i straffesaka.
Etterkvart viste det seg at tolken ikkje heldt mål. Saka er no utsett til fredag.
– Ordet sirkus har blitt brukt før. Eg tek ikkje dette særleg seriøst, seier Moland til NRK.
– Joshua er ikkje overraska
Mathilde Moland trur heller ikkje at Joshua French er overraska over utsettinga.
– Eg trur Joshua er veldig avslappa og at det no vart stopp trur eg han hadde rekna med. Han kjenner rettssakene frå tidlegare og han kjenner jo verkeleg Kongo etterkvart. Dette var ikkje noko overrasking for han, seier ho.
Dette gav også hovudpersonen sjølv uttrykk for.
– Inga utvikling her overraskar meg. Eg er lei av dette her no, sa French til NRK.
«Free Moland and French»
På armen ber Mathilde Moland eit armband med påskrifta «Free Joshua French». Mora til Tjostolv Moland har heile tida vore overbevisst om at French ikkje hadde noko med dødsfallet til sonen å gjere.
– Ja, det er eg framleis, seier ho.
Moland har også sendt eit brev til presidenten i Kongo.
– Der går det fram at vi meiner at Joshua er heilt uskuldig i forbindelse med Tjostolv sin død, og at vi ikkje forlangar noko ifrå kongolesiske styresmakter i den anledning, seier Moland.