Ifølgje politiet skal mannen ha truga ein vektar verbalt. Det var vektaren som tilkalla politiet.
– Mannen forlot først staden, men kom tilbake. Det var då vi pågreip han, seier operasjonsleiar i Agder-politiet, Martin Ugland til NRK.
Sit i arresten
Det skal ikkje ha vore våpen involvert. Men mannen skal ha komme med drapstrugslar mot vektaren.
Før han vart pågripen skal 29-åringen også ha kasta ein kopp med varm kaffi på ein drosjesjåfør.
– Det er mogleg han vert sikta for det også. Han sit no i arresten og ventar på å bli avhøyrt, seier Ugland.
Politiet kjenner mannen frå før.
Rutinene vart følgt
Leiar i Nav Kristiansand, Elisabeth Engemyr, seier at dei tilsette som var på jobb heldt fram jobben etter episoden. Dei vil få oppfølging etter arbeidstid.
– Vi har rutiner når slike ting skjer. Vi har mykje å gjere i dag, så dei valde å halde fram med å jobbe ut dagen, seier ho.
Nav-sjefen seier at dei har hatt færre trugslar den siste tida enn tidlegare.
– Utviklinga har eigentleg vore positiv sjølv om vi har episodar av og til. Eg trur det kjem av at vi har synlege vakter. Vi prøver også å lære opp våre tilsette til å handtere slike situasjonar, seier ho.
