– Det er godt med gode avslutningar på trening. Når vi lukkast gjentekne gonger på trening vil det fort kunne gjenta seg i kamp også, seier Fredriksen til ikstart.no.
Espen Hoff sikra cupavansement med ei perlescoring mot Strømsgodset på Sør Arena tidlegare denne veka. På gårsdagens trening varta den tidlegare Stabæk-spelaren opp med brassespark.
Brassespark
– Brassesparket var ein fryd å sjå på. Han får lagre det på harddisken og gjenta i kamp, seier Fredriksen til nettstaden.
Søndag klokka 18 står Vålerenga på motsett banehalvdel. Det er eit lag Start har slått 11 gonger i Kristiansand. 13 av oppgjera har endt med Vålerenga-siger. Oslo-klubben har aldri vunne på Sør Arena.
– Vi får håpe det vert betre i år og det har eg trua på at vi skal få til også. Vi har sluppe inn lite mål, minst i eliteserien, men vi scorar for lite, seier VIF-stoppar Stefan Strandberg til vif-fotball.no.
Andresen på tribuna
– Vi var gode offensivt i fjor, og eg trur det skal komme utover hausten no når fleire spelarar vert i betre form og skikkeleg skadefrie, seier sørlendingen med fortid i Mandalskameratene.
Under onsdagens cupkamp mellom Start og Strømsgodset var trenar Martin Andresen på tribuna.
– Han er ein luring, så vi må heve oss frå Strømsgodset-kampen. Vålerenga er eit godt lag, seier Fredriksen til NRK.no.
Spelefri
Vålerenga rauk ut av cupen i 2. runde og har hatt ei heil veke på treningsfeltet.
– Det kan nok bety litt at dei hadde spelefri onsdag, men vi må berre brette opp armane og gjere det vi kan, seier Start-trenaren.
Kampen mot Vålerenga vert den første kampen til Frode Fredriksen som hovudtrenar etter at Knut Tørum sa opp jobben.
Start stiller med følgjande mannskap mot Vålerenga:
Kenneth Høie - Brian Priske, Espen Knudsen, Jesper Mathisen, Rolf Daniel Vikstøl - Ernest Asante, Solomon Owello, Christer Kleiven, Espen Børufsen - Espen Hoff - Ole Martin Årst
Vålerenga sitt lag er førebels ikkje klart.