– Trafikken har stort sett gått i eitt felt forbi dei to bilane. Men det korkar seg raskt med den vegstandarden vi har, seier operasjonsleiar i Agder-politiet, Martin Ugland til NRK.
Det var litt over klokka 16 at politiet fekk melding om trafikkuhellet på Varoddbrua. Uhellet skapte umiddelbart køar på E18 i austgåande retning.
Køane strekte seg gjennom byen og ut mot Vågsbygd. Også på Lund vart det rapportert om lange køar.
– Eg veit ikkje kor lange køar det har vore, men eg veit at det stod kø gjennom tunnelen under Baneheia, seier Ugland.
Det tok nesten ein time før trafikken gjekk igjen.
– Det vil nok ta litt tid før trafikken går heilt som normalt igjen på grunn av dei lange køane som oppstod, seier Ugland.
Ingen personar vart skada i trafikkuhellet.