Tobias (15) fekk drøymejobben

– Mjelde får ta seg av den taktiske biten, seier 15-åringen.

– Det er klokt, ler Mjelde.

Dei to står på kunstgraset på Sparebanken Sør Arena i Kristiansand i underkant av ein time før cupkampen mot Vard Haugesund.

• Les også: Start vidare i cupen

Fekk namnet på dommarkortet

Skuleeleven frå Slemmestad i Buskerud har hatt arbeidsveke i Start. Her har han samla inn ballar, fylt på drikkeflasker og ynskt motstandarlaget velkommen til Sørlandet.

– Det har vore gøy og eg har kosa meg kvar dag, seier Tobias.

15-åringen var til og med oppført på dommarkortet til kampen mot Vard Haugesund i Kristiansand. Der fekk han tittelen «assisterande lagleiar».

– Det er kjekt å ha slike som Tobias i arbeidsveke. Han får moglegheit til å komme tett på laget, sitje på benken under kamp og sjå korleis det indre livet er, seier Start-trenar Mons Ivar Mjelde.

Gjekk i strupen på Vard

Det er Start som er klubben i hjartet til 15-åringen. Han er nevøen til tidlegare Start-spelar Tom Berhus. Han var mellom anna med då Start tok sølv i eliteserien i 2005.

Før kamstart utfordrar vi Tobias til å komme med resultattips.

– Eg trur vi vinn 3-0, seier han.

– Vi skal minst vinne 3-0, tilføyer sjefen sjølv, Mons Ivar Mjelde.

Frå benken får 9.-klassingen sjå eit Start-lag som går rett i strupen på 2. divisjonsklubben Vard Haugesund. Matthias Vilhjalmsson sender sørlendingane i leiinga berre fire minutt ut i kampen.

Halvtimen seinare doblar Bismark Acosta leiinga. I andre omgang set Alejandro Castro inn 3-0, før Vilhjalmsson scorar dagens andre til 4-0, som også blir sluttresultatet.

Vil bli eliteseriespelar

Draumen til Tobias er å ein dag spele fotball på høgste nivå. Veka i Start har gitt inspirasjon.

– Det gir motivasjon til å jobbe hardt. Det ser gøy ut å vere fotballspelar, seier han.

Mons Ivar Mjelde håpar at han ein dag ser Tobias i Start-drakt som spelar.

– Eg håpar opphaldet kan inspirere og motivere han til å trene mykje. Alt er mogleg om du vil nok, seier han.

Rett etter kampslutt kom han med følgjande tips til Mjelde.

– Han burde gi unggutane sjansen. Han sette inn Matias Rasmussen, men han burde kanskje sett han inn tidlegare, seier 15-åringen.