– Vi vart bombardert med telefonar frå folk som hevda å ha sett ulv på E18. Vi var tre på jobb som måtte ta oss av desse telefonane, seier operasjonsleiar ved Agder politidistrikt, Ingrid Mæhre til Agderposten.
Var skråsikker
Det var ved 23-tida tysdag kveld at dei første telefonane om ulv kom inn til politiet. Også ein lokal jeger ringde politiet for å fortelje om ulveobservasjon.
– Han var skråsikker på at han såg ulv, seier Mæhre til avisa.
Politiet sende ut ei patrulje etter telefonstormen for å sjå om dei fann noko ulv. Men det gjorde dei ikkje. Også ein mann frå redningsbilen Viking var ute og prøvde å lokke til seg dyret med kjøttkaker. Han var overbevist om at dette ikkje var nokon ulv.
Omtrent to timar seinare kom svaret – frå ein hundeeigar.
Usikker
– Han opplyste at han sakna ein av hundane sine. Han kunne opplyse at det likna på ein ulv, seier Mæhre.
På Facebook-sida til Jakt og Friluft AS skapar observasjonane debatt. Leiar av viltnemnda. Øyvind Froland, er sitert på følgjande:
– Eg har sett bilete og eg er usikker på om dette er ein ulv, eller ein husky. To huskyar har vore lause i området i natt og den eine er hanka inn av Viking, seier Froland.