– Det var sikkerheitsbeltet som redda livet mitt. Bruk bilbelte. Dei som ikkje gjer det er uhyggeleg dumme. Bruk belte når du er ute å køyrer og tenk på familien, seier 79-åringen til NRK.no.
Det var laurdag ettermiddag at sørlendingen hamna utfor vegen. Han hadde akkurat køyrt oldebarna til flyplassen i Kristiansand då noko plutseleg skjedde på riksveg 41 ved Søre Herefoss.
– Eg veit ikkje kva som skjedde. Plutseleg drog bilen seg mot venstre. Eg trur kanskje eg køyrde på ein isklump, men det er ikkje sikkert det var det. Kanskje eg punkterte. Eg veit ikkje, seier han.
Kasta rundt
Bilen vart kasta over autovernet og rulla rundt fleire gonger før den til slutt landa på taket like ved ei elv. 79-åringen var bevisst heile tida og vart redd då bilen stoppa etter fleire rundkast.
– Eg kjende bensinlukt og vart nærast hysterisk fordi eg var redd det skulle byrje å brenne. Eg klarte å løyse bilbeltet og fekk krabba ut sidevindauget. Eg skar meg fleire stader på glasskåra så eg blødde, seier han.
– Eg kom ut i friluft, men eg ville prøve å komme meg litt vekk frå bilen. Eg kom meg berre ein meter, då klarte eg ikkje meir. Eg var heilt utkøyrt, seier han.
På isen like ved bilen låg Toralf Bernt i nær to timar. Berre nokre få meter ovanfor høyrde han bil etter bil suse forbi.
– Eg tenkte det var rart at ingen bilar såg meg. Dei køyrde forbi i det uendelege. Men så var det heldigvis ein tyskar frå Hamburg og ein danske som hadde sett meg og stoppa, seier han.
Dei to surra 79-åringen inn med teppe for at han skulle få varmen i seg att. Berre nokre få plussgrader gjorde at han var godt nedkjølt då han vart funnen.
– Dei skulle rekke danskebåten, så eg sa til dei at dei måtte komme seg av garde. Det spelar inga rolle svara han. Så det var nokre greie turistar, smiler han.
Vil snakke med redningsmennene
Redningsmennene varsla politi og ambulanse. Kort tid etter var luftambulansen på plass og han vart frakta til sjukehuset i Arendal.
– Eg bad ambulansefolka om å få namnet på dei, så eg håpar å få snakke med dei. Dei fortener ei stor takk og eg vil gjerne prate med dei og få takka dei, seier han.
På sjukehuset kunne legane konstatere at han ikkje hadde pådrege seg alvorlege skader. Dei største skadane pådrog han seg då han krabba ut gjennom det knuste vindauget.
– Eg har så kraftig beinbygnad, så eg toler ein støyt, flirer han.
Truleg vert han skrive ut frå sjukehuset måndag ettermiddag.
– Eg har blitt teke utruleg godt hand om. Det er utruleg flinke folk her, seier han.
Tenkte på kona
Medan han låg å venta på hjelp var det to tankar som gjekk att heile tida. Bilbelte og kona som han har vore gift med i 59 år.
– Eg tenkte at det hadde vore godt om hadde vore hos meg, seier han.
– Kva var det første du sa til kona då du såg ho igjen?
– Å, det var godt å kjenne lukta av deg. Det er noko eg brukar å seie. Det er så godt å kjenne varmen hennar. Ho er så voldsomt snill, fortel han på gråten.
Trass i at han kom ut trafikkulykka som kunne ha kosta han livet, trur han ikkje at han vil vere redd for å setje seg bak rattet igjen.
– Eg har tenkt på at slikt kan skje mange gonger. Eg har køyrt bil i 60 år og har aldri vore borti noko som helst av biluhell. Det var litt rart at det skulle skje akkurat no. Men det er slikt som kan skje, seier 79-åringen.
– Bruk bilbelte!
Under intervjuet peikar han fleire gonger på kor viktig det er å bruke bilbelte. No ber han alle bilistar om å bruke bilbelte når ein er ute i trafikken.
– I bilen er det sikkerheitsbilete som er det aller viktigaste. Så må ein sørgje for at bilen er i god stand. Køyr aldri med dårlege bremser. Punktering kan ein aldri garantere seg mot, men det er mykje ein kan gjere for å unngå slikt, seier han.
Måndag vert han mest truleg skriven ut frå sjukehuset. Det første han skal gjere då er klinkande klart.
– Eg skal gi kona mi ein skikkeleg god klem. Så må eg takke alle barna som har vore så merksame. Dei ringjer og spør. Det er voldsomt fint, seier han.
Politiet har varsla at dei vil snakke med 79-åringen. Det vil og bli gjort tekniske undersøkingar av bilen etter ulykka.