– Det er ingen bombe. Dette er David mot Goliat. I dei fleste kampane Larvik spelar er resultatet som her. Slik er det, seier Vipers-trenar Gunnar Pettersen til NRK etter kampslutt.
Larvik leia 18-10 til pause og leika seg til tider mot eit tafatt Vipers-lag i Aquarama.
I andre omgang scora Vipers Kristiansand berre fire mål på dei 23 første minutta. Likevel var Pettersen mest nøgd med nettopp andre omgang.
– Det er første omgangen som er spesielt dårleg. I andre omgang er vi mykje meir med forsvarsmessig. Men vi gjer for mange feil som du ikkje kan gjere mot Larvik slik at dei får kontre. Då vi vann i fjor gjorde vi nesten ikkje ein einaste feil, seier han.
Målsetninga til Vipers Kristiansand er klar: å bli Norges beste handballag. Det betyr at dei må stoppe sigersvande Larvik-jenter.
Stange laga trøbbel
Men vestfoldingane ser ikkje ut trenge å frykte konkurranse med det første. I tysdagens seriekamp i Aquarama i Kristiansand var sørlendingane sjanselause mot handballgiganten frå Larvik.
– Det er landslagsspelarar på benk og bane frå det beste laget i verda. Det er rått parti. Vi kan ikkje vere sure fordi vi ryk i ein slik kamp, seier Pettersen.
I ein første omgang der Nora Mørk ikkje hadde fullklaff stod Tine Stange fram for serieleiaren. I første omgang kom ho på scoringslista sju gonger.
I andre omgang var det ingen verdens ting som stemte for Vipers. Larvik køyrde over sørlendingane og gjorde akkurat som dei ville og vann til slutt 32-18.
Tre strake tap
Dermed revansjerte dei tapet for Vipers i sluttspelet i mai i fjor.
Vipers sin store profil Marta Tomac sat på benken gjennom heile kampen mot Vipers.
– Marta har ikkje trena verken måndag eller tysdag på grunn av spenning i muskulaturen, som vi er redd kan utvikle seg til strekk. Det er dumt å ta ein sjanse i ein slik kamp, seier Pettersen.
Laurdag møter Vipers Krim i kvartfinalen i europacupen heime i Aquarama.
Vipers står no med tre strake serietap. Sørlendingane ligg no fire poeng bak Glassverket som held bronseplassen. Det er fem poeng opp til Byåsen på andreplass.