– Vi har vel dei siste åra sett at det er ganske stabile tal. Vi ligg mellom 30 og 40 i året, seier kontorsjef for tollarane i Kristiansand, Helge Breilid til NRK.
Ifølgje Kripos er den mest kjende reiseruta til Norge via Danmark og Sverige. Det finst ingen tal på kor mange som vert smugla til Norge.
Smugla 80 afghanarar
Kontorsjefen seier at menneska prøvar seg på fleire måtar for å komme til Kristiansand.
– Dei kjem med bil, vi har funne personar gøymde i bagasjerom og dei har komme gåande av ferja, seier han.
I fjor vart to kristiansandarar dømde til fengsel i Tyskland for å ha smugla nesten 80 afghanarar til Skandinavia.
Fredag starta rettssaka mot tre menn som vart stoppa etter danskebåten i august i fjor. Påtalemakta meiner at ein av dei hadde falsk identitet.
Frå krigsherja land
Breilid fortel at det er folk frå krigsherja område som prøver å komme seg inn til Norge.
– Dei fleste er afrikanarar, afghanarar, iranarar eller personar frå Irak. Det er nok desse som går att, seier han.
– Kva gjer at de fattar mistanke og stoppar dei?
– Det er gjerne dårlege forklaringar, kanskje legitimasjonspapir som stemmer dårleg overeins med personen vi har føre oss. Eller så er det at dei ikkje har papir i det heile. Dei kan ikkje gjere greie for identiteten sin, seier han.