– Vi tek sjølvkritikk på dette. Vi burde ha byrja på dette tidlegare, seier rådgjevar Bjørne Jortveit i ATP-samarbeidet i Kristiansand til NRK.
Innfartsparkering betyr at du parkerer bilen ved busslinja - og tar buss til byen.
Det er parkeringsplassen i Rona, aust for Kristiansand, som stengjer 1. oktober. Dette anlegget er knutepunktet for folk i Randesund-området, anten ein skal hoppe på bussmetroen i byen, eller om ein skal reise med buss austover.
Skal byggje bensinstasjon
Bakgrunnen for at stenginga er at det skal byggjast eit senter i Rona med tilhøyrande bensinstasjon.
– Anlegget kjem innanfor riggområdet og det skal byggjast ein bensinstasjon her, forklarar Jortveit.
– Vi jobbar knallhardt med å få etablert ein mellombels innfartsparkering no i haust, seier han.
Fleire brukarar NRK snakka med ristar på hovudet når dei får vite at park and ride-anlegget skal stengjast.
– For meg verkar det mot si hensikt, dersom meininga med dette anlegget er at folk skal ta bussen, seier ein av dei.
Forhandlar med grunneigarar
Bjørn Jortveit i kommunen seier at dei no er i forhandlingar med grunneigarar i same område for å få til eit nytt, mellombels anlegg.
– Vi har ikkje noko i boks endå. Eg kan ikkje love noko før vi har kontrakt med grunneigarar, seier han.
Ein av dei som brukar parkeringsplassen, for så å hoppe på bussen, fortel at han no kjem til å bruke bilen.
– Det er hol i hovudet. Dette verkar mot si hensikt. I det siste har eg brukt den mykje, men no vert det bil i staden, seier han.