Vegen vart stengd fredag kveld klokka 19 på grunn av sprengingsarbeid i samband med rasfaren.
Planen var at den skule opne att måndag morgon, men no viser det seg at arbeidet som vart gjort i helga ikkje er tilstrekkeleg.
Ustabile steinmassar
– Vi har vurdert fjellet over E39 etter helgas sprengingsarbeid, og funne at sikkerheita ikkje er god nok til at vi kan opne vegen, seier prosjektleiar i Statens vegvesen Kjell Soltvedt i ei pressemelding.
Ifølgje prosjektleiaren har massane som utgjer rasfaren blitt meir ustabile etter sprenging i helga.
Omkøyring skjer på fylkesveg 459, fylkesveg 455 og fylkesveg 461 via Laudal.
– Vi beklagar problema dette medfører for trafikantane på strekninga, seier Soltvedt.
Redde bilistar
NRK har tidlegare fortalt om bilistar som har vore redde for å køyre på strekninga på grunn av steinmassane som ligg i vegkanten.
– Det var mange store steinar som låg tett inntil vegen. Eg følte at fleire av steinane hang over fendarane som var sett opp, sa Kristin Lønn til NRK tidlegare denne måndagen.
Bakgrunnen for dei utrygge steinmassane er sprengingsarbeid i samband med utviding til fire køyrefelt på E39 i Søgne.