– Ein del av oss har merkar det på rygg og akilles. Vi er godt vande med å trene i Nedeneshallen som er veldig fleksibel og god demping i parketten, seier André Jørgensen Hofstøl til NRK.no.
– Det er naturleg at det kjem litt småting når ein byter underlag til trening og aukar treningsmengda, seier han.
For raske
Før denne sesongen flytta eliteserieklubben inn i Sør Amfi med topp fasilitetar. Men overgangen har altså ikkje gått heilt etter planen, skriv Agderposten.
– Det er ikkje bra. Men vi har kanskje vore litt raske med overgangen. Vi skulle kanskje ha teke det litt meir gradvis, seier ØIF-spelaren.
Etter flyttinga frå Nedeneshallen var forventningane til spelekomforten i Sør Amfi særs store. Klubben gjekk frå godt gammaldags parkettgolv til sportsgolv med kunststoff.
Vil flytte treningar
– Golvet er hardare. Vi snakkar om eit golv som ligg rett på betong. Golvet i Nedeneshallen ligg på eit bjelkelag. Samstundes er det større friksjon i det nye golvet som kanskje har litt å seie, fortel Jørgensen Hofstøl.
Klubben vil no leggje nokre av treningane til gamlehallen.
– Vi må ta den overgangen no. Vi skal ha eit par treningar i Nedeneshallen framover. Så får vi sjå om det kan hjelpe, seier han.