– Det er alltid like gøy å vinne kampar og titlar. Det er målet kvart år. Det var ikkje den beste kampen, men det er godt å ha nokre kampar under beltet før semifinale i meisterligaen, seier Vipers-spelar Emilie Hegh Arntzen til NRK.
Sola har hatt ein kjempesesong med bronse i eliteserien og sin første cupfinale.
Det var få som gav dei noko som helst sjanse mot Vipers Kristiansand, som skal spele semifinale i meisterligaen i slutten av mai.
Men Camilla Herrem og lagvenninnene skapte spenning i cupfinalen.
– Taktisk sterk kamp
Dei brukte lang tid i alle situasjonar for å dra ned tempoet i kampen. Dei stoppa nesten alle innspel til Heidi Løke i første omgang.
Samstundes plukka Sola-keeper Kimberley Megan Ewanovich mange ballar.
– Ein taktisk sterk kamp av Sola, seier NRKs handballekspert Peder Langfeldt.
Åtte minutt ut i kampen leia faktisk Herrem og co. 4-3, før Henny Reistad og Vipers vakna. Det var berre to mål som skilde laga til pause. Vipers leia 10-8.
Vipers reiste seg
I andre omgang fekk Vipers til sitt spel. Henny Reistad og Nora Mørk fekk ballen i nettet, og dei fekk til innspela til Heidi Løke på streken.
Ti minutt ut i andre omgang viste tavla 17-10 til Vipers.
Sola gav seg ikkje. 14 minutt ut i omgangen var dei berre fire mål bak.
Men så var det slutt.
Dei siste ti minutta vart ein parademarsj for sigersvande Vipers-jenter. Katrine Lunde redda det meste. I andre enden var det Reistad og Mørk som styrte showet.
– Vi slurvar og bommar litt, men det held her i cupfinalen. Men det vil ikkje halde i Final four og mot CSKA Moskva, seier Vipers-trenar Ole Gustav Gjekstad.
Dei vann til slutt cupfinalen 29-16 og vann sin fjerde strake cupfinale. Tysdag tok dei sitt fjerde strake seriegull. Dette var den siste kampen på norsk jord som Vipers-spelar for ei rekkje spelarar. Blant andre Malin Aune.
– Det er litt spesielt og rart at det kun er ei helg igjen. Det blir veldig rart å reise. Men eg får prøve å ta nye steg i ein annan klubb, seier Aune.
Neste utfordring for Vipers blir altså semifinale i meisterligaen mot CSKA Moskva siste helga i mai.