Måndag sa politiet til NRK at dei har videoopptak av to personar som var inne i fjøset på Søgne videregående skole der dyra kom ifrå.
– Meld dykk! Så slepp vi masse bråk med at politiet må komme og hente dykk. Stå for det de har gjort, sa lensmann i Søgne og Songdalen, Terje Pedersen til NRK.
Set opp nytt overvakingskamera
Dei to hadde med seg eit bur ut ifrå fjøset. Dette buret vart funne like ved kyrkja.
Tysdag fekk mediene tilgang til politiet sine eigne bilete av funnet på kyrkjetrappa. Bileta viser at dei fire halshogde dyra var lagt i korsformasjon.
– Dersom dette kan gje saka meir merksemd og bidra til nye spor i saka, er det bra, seier lensmannen til Fædrelandsvennen tysdag.
Avisa skriv også at Søgne videregående skole no skal setje opp overvakingskamera også på andre sida av fjøset. Dermed vil begge inngongane vere overvaka.
– Heilt sprøtt
Politiet har så langt ikkje ville kommentere om dei veit kven dei to personane på overvakingsvideoen er.
Det var måndag i førre veke at kyrkjegardsarbeidar Kurt Helge Almendingen oppdaga dei halshogde dyra på kyrkjetrappa.
– Det er heilt grusomt, og heilt sprøtt. Det er veldig skremmande når det blir lagt i ein korsform føre kyrkja, sa Almendingen til NRK i førre veke.