På fleire strekningar er det innført kolonnekøyring i Finnmark.
– Folk bør berekne god tid om ein må ut å køyre. Ein bør ha med godt med klede, mykje drivstoff og mat, seier trafikkoperatør ved Vegtrafikksentralen Nord, Christer Angermo.
Fylkesveg 98 Ifjordfjellet er stengt på grunn av uvêr.
På fylkesveg 890 Kongsfjordfjellet er det innført kolonnekøyring på grunn av uvêr. Det same gjeld på fylkesveg 891 Båtsfjordfjellet.
Vegtrafikksentralen melder også at det kan vere fare for glatte parti både i Nordland og Troms.
Ber folk ta seg tid
På Sørlandet, Telemark, Vestfold og Buskerud er det som regel E18 og E16 det «flaskar» seg på store utfartsdagar.
– Det er veldig mange bilar ute. Folk må halde køen sin. Hasardiøse forbikøyringar blir berre tull, seier Anniken Island ved Vegtrafikksentralen region Sør til NRK.
Fredag har trafikken gått greitt.
– Det er mykje trafikk på E16 på Sollihøgda, men det er ikkje forseinking på meir enn kring ti minutt, seier ho.
Det har vore fleire trafikkuhell på E18 i både Vestfold og Agder-fylka fredag ettermiddag, men trafikken går stort som normalt der fredag kveld.
To uhell på E6
Også på Austlandet går påsketrafikken stort sett greitt.
Det har vore to trafikkuhell på E6.
Dette fører til saktegåande kø frå Oslo sentrum til Jessheim.
– I tillegg til påskeutfart er det mykje trafikk i samband med Birkebeinerrennet. Så det er nordover dei fleste køyrer. Bortsett frå to trafikkuhell går dette greitt, seier Christofa Kei-Nilsen ved Vegtrafikksentralen region Aust.
Ferjer innstilt på Vestlandet
Også på Vestlandet går trafikken greitt.
Bortsett frå ferjene Kinsarvik – Utne, og Kvandal – Utne, som er innstilt på grunn av tekniske problem, er det ikkje meldingar om forseinking i trafikken.
– Det er mykje trafikk på ferjene i Stavanger-området, men det er ikkje meldt om ekstra ventetid, seier Jon Andreas Omdal ved Vegtrafikksentralen region Vest.
I Møre og Romsdal, og trøndelagsfylka er det ikkje meldt om problem i trafikken utover vanleg ettermiddagsrush.