Skulle hente inspirasjon til ny Vipers-hall: – Holy moly!

– Wow, det er det sjukaste, seier idrettssjef Christian Jørgensen i Kristiansand når han går inn i mektige MVM Dome i Budapest.

– Det er litt større enn heime, ja. Ti-gangen Aquarama, seier varaordførar Erik Rostoft.

Duoen representerte kommunen i samband med at Vipers Kristiansand spelte meisterligafinale i Budapest.

– Heilt rått

Vipers vann meisterligaen for tredje år på rad. Men heimebana til Vipers står ikkje i stil til dei sportslege prestasjonane.

Hallen tilfredsstiller ikkje krava for å delta i meisterligaen.

Verdas beste kvinnelag har fått dispensasjon til å spele i Aquarama med ein tilskodarkapasitet på rundt 2000.

– Det er veldig inspirerande. Slike idrettsarrangement er noko anna enn berre idrett. Vi må nok opp i skoa litt heime også, seier Rostoft.

– Eg veit ikkje heilt kva eg skal tenkje. Det er heilt rått. Eg såg føre meg ein hall, men ikkje dette, Eg trudde ikkje handball var så «gale» og så stort, seier Jørgensen.

Vil bygge fleirbrukshall

Det har vore snakk om bygging av ny hall i fleire år allereie.

Ein arena som skal innehalde fasilitetar til fleire idrettar, konsertar, messer og andre arrangement.

Truleg vil ein ny arena bli bygd på Gimlemoen.

– Byen vil trenge ein innandørs idrettsarena før eller seinare, dersom ein skal ha toppidrett på det nivået Vipers er på no, seier Morten Jørgensen i Vipers.

I tillegg til idrettssjefen og varaordføraren var kommunen representert med fleire.

Blant andre ordførarkandidatane til Høgre og Arbeidarpartiet.

Ingen lovnader frå ordførarkandidatar

Men ordførarkandidatane vil ikkje love når ein ny hall står klar i Kristiansand.

– Vi har det i programmet og vil leggje til rette for at arenaen kjem på plass så raskt som mogleg. Dette hastar. Vipers, verdas beste handballag, tren ein framtidsretta arena, seier Mathias Bernander (H).

– Kan ein ny hall stå klar til neste periode i bystyret?

– Eg torer ikkje å seie det til deg no. Vi må komme i gang. Det er mange x-faktorar her. Men vi skal ha fullt fokus på det frå dag ein i neste periode. Det kan eg love, seier Bernander.

Cultiva: – Interessert

– Det er viktig å ta med dette som inspirasjon. Ta det med heim, trekkje pusten og sjå kva som er mogleg og kva Kristiansand treng, seier Kenneth Mørk (Ap).

– Når kan ny hall står klar?

– Viss vi finn gode løysingar saman med andre idrettar treng det i alle fall ikkje vere ti år fram i tid, seier Mørk.

Også leiaren i stiftinga Cultiva var med på omvisinga i Budapest. Ho vil ikkje love støtte til hallprosjektet.

– Vi sparar til store investeringar, men vil aldri initiere. Men vi vil vere interessert i å vere ein part dersom det skulle komme opp noko, seier dagleg leiar Kirsti Mathiesen Hjemdahl.