Skadefri veteran klar for ny sesong

– Heile det medisinske apparatet har hjulpe meg og har vore veldig opne for individuell tilpassing og lytte til kroppen min. Dei kjenner kroppen min nesten betre enn eg sjølv gjer, seier Ole Martin Årst til NRK.

I oktober i fjor bestemte veteranen seg for å leggje fotballskoa på hylla . Heile 2008-sesongen vart spolert på grunn av skader. Men han gav aldri opp og var tilbake på fotballbana i mars i fjor. Men det blei med to kampar før han igjen vart skada, og seinare bestemte seg for å leggje opp.

Skreiv under

Men lysta til å spele fotball igjen kom raskt tilbake då skaden var lega og sesongoppkøyringa starta. I slutten av januar i år skreiv Årst under ei eittårskontrakt med sørlendingane.

– Det er han sjølv som kjenner korleis ting er. Å ta hensyn til kroppen hans er viktig, seier fysisk trenar og fysioterapeut i Start, Jørgen Rostrup.

– Litt småpell vil der alltid vere. Men så lenge han klarar å gjennomføre det meste av grunntreninga blir det bra, seier Rostrup.

– Spesielt

I dagens serieopning mot Sandefjor utgjer Årst truleg spissduoen saman med 19 år gamle Mads Stokkelien.

– Eg la opp i fjor og skulle eigentleg sitje heime i godstolen med ein kopp kaffi og følgje eliteserien. Så står eg plutseleg oppi det igjen. Eg skal ikkje leggje skjul på at det er litt spesielt, men desto meir gledeleg, seier Årst.