Politiet har også fått inn fleire tips etter valdtekta.
Ei kvinne i 20-åra skal ha blitt overfalt og valdteken i området Lillesandsveien og Ebbelsgate like utanfor sentrum.
Fleire vitne har meldt seg sidan søndag. Politiet har også gjort fleire avhøyr av vitne. Dei har også fått inn fleire tips frå publikum.
– Brukar alle middel og metodar
– Nokre av tipsa sjekkar vi nærare. Elles held etterforskinga på med fullt trøkk. Vi sjekkar ut og gjer dei undersøkingane vi meiner er naudsynte, seier politioverbetjent Eva Marit Gaukstad til NRK.
Politiet etterlyser ein mann mellom 30 og 45 år etter valdtekta. Mannen skal vere mellom 160 og 180 centimeter høg. Han skal vere mørkhuda og snakka snakka engelsk og gebrokkent norsk.
– Eg ynskjer ikkje å vere så veldig konkret kring kva vi gjer i etterforskinga. Vi etterforskar ei alvorleg sak med ein førebels ukjend gjerningsmann. Vi brukar alle middel og metodar vi kan, seier Gaukstad.
Vurderer alle tips
Politiet etterlyser framleis tips frå folk, som kan ha sett den etterlyste mannen.
– Vi vurderer alle tips som kjem inn og vurderer kven som skal avhøyrast fortløpande, seier ho.
NRK fortalde måndag at dei meiner dei har ein så god beskrivelse av mannen at dei vurderer å gå ut med ei teikning av mannen.
Tysdag seier politiet at det ikkje er aktuelt no. Årsaka er at dei fryktar at ei teikning kan villede publikum, som kan ha relevante opplysningar.