På Gimlekollen i Kristiansand vart det registrert 40 forsøk på passeringar i feil køyrefelt berre i går. Men ifølgje vegvesenet er det umogleg å køyre gratis gjennom automatiske bomstasjonar.
Umogleg å køyre gratis
– Bomstasjonane er spesifisert, bygd og testa for alle typar passeringsmoglegheiter gjennom stasjonane, seier senioringeniør i Statens vegvesen, Ivar Sørensen til NRK.no.
– Det gjeld både ordinær passering i riktig køyrefelt og retning, passering i motgåande køyrefelt og utanfor vegskulder. Det skal ikkje vere mogleg å passere utan å bli registrert, seier Sørensen.
- LES OGSÅ: Sniker seg gjennom nattestengte tunneler
NRK.no sin fotograf fanga opp fleire frekke bilistar på Gimlekollen i Kristiansand tysdag. Bilisten la seg bevisst over i motgåande køyrefelt for å køyre gratis.
– Utstyret tek vare på alle typar registreringar og du vert fotografert så sant du ikkje har ei gyldig brikke som vert regiserert ved passering, seier han.
Trafikkfarleg
Bomstasjonen på Gimlekollen ligg like ved ein sving. Å leggje seg over i feil køyrefelt kan skape farlege trafikksituasjonar.
– Ein bryt etablerte køyremønster som kan føre til trafikkfarlege situasjonar. Det bør ein for all del unngå, seier senioringeniøren.
– Ein konsekvens dersom folk ikkje sluttar med dette, må ein kanskje vurdere tiltak i bomstasjonane for å unngå den slags, seier han.
I januar i fjor kom det fram at folk snik og juksar for millionar av kroner på ferjer og andre transportmiddel i Møre og Romsdal. Det førte til at ferjeselskapa skjerpa kontrollane.
Snik på Svinesund
Same månad kom det fram at stadig fleire bilistar som kryssar grensa ved Svinesund legg seg ut i autovernet for å unngå bompengar.
– Det er nok nokre som har fått nokre ekstra bulkar - kun for å spare 20 kroner, sa Jeanette Begby frå Group 4 Security.
- LES OGSÅ: Ofrer lakken for slippe bompenger
Bompengeselskapet sette opp hindringar for dei som køyrde ulovleg, utan å lukkast.
– Vi har sett opp kjegler for å hindre bilistar i å køyre ulovleg. Dei kan flyttast på og det hender bilistane flyttar desse bevist for å sleppe å betale avgift, sa ho.