Vetle (19) erstatta Thorkildsen – klinka til med ny pers

– Det var heilt rått. Kjempegøy, seier 19-åringen på telefon frå Estland.

Sørlendingen kasta 72,57 meter og sette ny personleg rekord. Samstundes kasta han over kravet til U23-EM som går same stad neste år.

– Eg tok det berre som ei erfaring i starten, for å sjå korleis det gjekk. Så såg eg jo at det gjekk veldig, veldig greitt. Det var kanonmoro, seier spydkastaren frå Søgne.

Inspirert av Thorkildsen

Andreas Thorkildsen har slite stor med forma og valde å stå over lag-EM. Inn kom altså ein ny sørlending, for å erstatte den olympiske meisteren.

– Andreas har vore ein veldig stor inspirasjon for meg. Han er frå Sørlandet og viser at det går an å bli verdas beste spydkastar frå Sørlandet og Norge, seier Brunvatne.

No håpar 19-åringen på framleis framgang utover i sesongen.

– Eg tek nesten stemne for stemne, så får eg sjå korleis det går. Eg har sett meg nokre mål, til dømes U23-EM neste år. Det har eg vist at eg klarer no. Så er det å gjere det best mogleg i NM og junior-NM. Eg får ta eitt år om gangen, seier han.

Den norske troppen leverte gode resultat gjennom heile helga. Innsatsen heldt til opprykk til Superligaen. Dermed er nordmennene klar for å kjempe mot dei beste nasjonane i Europa neste år. Det blir det feiring av.

– Dei har planlagt bankett frå klokka 20. Men det er fleire stemner framover, så vi må halde det litt under kontroll, seier han.

Mjåland fekk skryt

Også Benedicte Hauge og Trine Mjåland frå Kristiansand var med i den norske troppen. Dei to sørlendingane var med på 4x400 meter stafett, der dei enda på 3. plass med tida 3.34,23.

800 meter-spesialist Trine Mjåland fekk skryt av NRKs friidrettsekspert Vebjørn Rodal etter målgang på sin 400 meter-etappe.

– Trine Mjåland gjorde eit kjempeløp. Ho vert stadig betre og viser stayerevne og fart som er viktig på ein 800 meter. Eg ser ikkje vekk ifrå at ho vil presse tida si på 800 meter ytterlegare ned utover sesongen, sa Rodal.