Kvinna i 50-åra vart meldt sakna tysdag ettermiddag.
Både Sea King-helikopter, politifolk med hundepatruljar og frivillige deltok i søket etter kvinna.
Kom heim
Leiteaksjonen vart sett i gong litt før klokka 18 tysdag, og avslutta ved firetida natt til onsdag utan resultat.
Men berre kort tid etter at leiteaksjonen vart avslutta kom kvinna heim.
– Det er meiningslaust å drive leiteaksjon på dei premissane, seier operasjonsleiar i Agder-politiet, Per Kristian Klausen til NRK.
Politiet etterforskar no omstendigheitene rundt det som har skjedd.
Seinare skal politiet ta stilling til om dei vil krevje erstatning.
– Saka går vidare til juristar som vurderer om saka får etterspel, seier Klausen.
– Eg blir oppgitt
Politiet vil førebels ikkje seie noko om kva forklaring kvinna har gitt.
– Det er andre som treng hjelp. Når vi får ein leiteaksjon må vi prioritere. Dette blir gale i alle baugar og kantar. Eg blir oppgitt, seier Klausen.
Redningsleiar ved Hovudredningssentralen i Sør-Norge, Stein Solberg, seier dei av og til opplever at sakna personar plutseleg dukkar opp.
– Vi tek alle oppdrag like alvorleg uansett, seier han.