Rekdal sin elleville statistikk gir Start håp om cupfinale

– Det krevst ein enorm prestasjon. Det er slik i fotball at det ikkje er noko som er hundre prosent sikkert. Det er alltid ein sjanse. Det er den vi må prøve å gjere størst mogleg, seier Rekdal.

I 2005 feira Start 100-årsjubileum, og var ein offside frå sitt tredje seriegull. Men i cupen ligg det nærast ein «forbanning» over kristiansandsklubben.

Laget har spelt sju semifinalar, men aldri makta å komme til cupfinalen.

Sjekk denne merittlista

No håpar Start-fansen at Rekdal, som kom inn i sommar då Mark Dempsey fekk sparken, kan vere trenaren som leiar dei til sin første cupfinale.

Rekdal har definitivt historia på si side før torsdagens semifinale mot Rosenborg.

• 1994: Vann cupfinalen med Molde som spelar.
• 2002: Var spelande trenar i Vålerenga då dei slo Odd i cupfinalen.
• 2009: Var trenar i Aalesund då dei kom til sin første cupfinale nokosinne. Dei slo Molde 7–6 etter straffespark.
• 2011: Vann cupfinalen med Aalesund igjen. Denne gongen 2–1 mot Brann.
• Rekdal har også vunne cupen for juniorar med Molde.
• Sjølv meiner han at han berre har tapt ein semifinale.
• Rekdal har altså vunne fem av fem cupfinalar. No jaktar han sin sjette.

Frå opptur til nedtur

I år vart draumen for alvor blåse liv i, då laget tok seg vidare til semifinalen, etter å ha slått Bodø/Glimt i kvartfinalen.

Så vart det klart kven dei møter i semifinalen. Rosenborg borte på Lerkendal.

Igjen var draumen knust, meinte mange.

– Vi må finne ei moglegheit til å slå dei. Det er det dette handlar om. Eg skal ikkje seie at vi må prestere over evne, men vi må prestere opp mot maksimalt i 90 minutt pluss tillegg. Så må vi kanskje ha litt marginar og håpe Rosenborg ikkje har sin beste dag.

– Ubehag og press

– Eg trur det er litt tilfeldig. Det handlar om å gjere ein best mogleg prestasjon slik at sjansen aukar. Jo lengre kampen går og det står uavgjort, eller kva det er, så vil sjansen vere der.

– Kva seier du til spelarane?

– Dei må ha det gøy. Det må jo vere kjempeartig å vere i ein posisjon der du kan slå ein kjempefavoritt ut av ein semifinale og lage historie på Sørlandet. Så må dei tore å sleppe seg lause og jobbe beinhardt. Ein slår ikkje Rosenborg på flaks, seier Rekdal.

– Litt ubehag og press må også alle føle. Har du det for fint, presterer du dårlegare enn du bør.

Trur på Rosenborg-fiasko

Hos Rosenborg sin største rival Molde, trur dei litt Rekdal-magi kan vere det som skal til for å bryte «cupforbanninga».

– Eg trur dei vinn. Det er eit veldig vanskeleg lag å møte, så dei kjem til å skape trøbbel for Rosenborg, seier Molde-spelar Vegard Forren.

– Kjetil gjer mykje med laget. Det er spelarane som avgjer ute på bana. Men Kjetil klarer å få spelarane til å yte maks. Det er det som skal til i ein semifinale. 90 minutt, alt kan skje, seier Molde-trenar Ole Gunnar Solskjær.