– Det dreiar seg om alt frå sal av narkotika til andre kriminelle handlingar, seier avsnittsleiar for organisert kriminalitet i Agder politidistrikt, Leif Vagle til NRK.no.
Tysdag skreiv NRK.no om Tollvesenet i Kristiansand som hadde beslaglagt 40 kortstokkar og kontaktlinser. Korta er laga slik at pokerspelarane kan sjå motstandarane sine kort ved å ha på seg linsene. Ifølgje Tollvesenet var korta tenkt brukt fleire stader i Norge.
Veit om pokerkaféar
– Kortstokkane ser normale ut. Du kan ikkje sjå at dei er manipulert, men vi valde å ta ein nærare titt på dei, sa kontorsjef Helge Breilid ved Kristiansand tollregion om korta.
No hevdar politiet at dei veit om fleire kaféar i Kristiansand der ulovleg gambling er ein del av tilbodet.
– Det er eine og aleiene forsamlingslokale for folk. Det er i fleire av dei utanlandske miljøa at dette førekjem, seier Vagle.
Det skal vere personane som driv kaféane som tvingar pokerspelarar i gjeld til å gjere kriminelle handlingar. Trass i at politiet hevdar at dei veit om slike gamblingkafèar, går dei skjeldan til aksjon.
I det skjulte
– Kaféane er jo opne for offentlegheita, så det er greit å gå inn. Men desse spela skjer ikkje med pengane på bordet synleg. Dei er til ein viss grad litt i det skjulte. Difor kan det vere problematisk å avsløre dei, og det krev ein del ressursar, seier han.
Ifølgje Vagle er det skjeldan personar med titusenar i pokergjeld kjem til politiet, sjølv om dei vert truga til kriminelle handlingar.
Avsnittsleiaren hugsar sjølv eitt døme frå fleire år tilbake der ein kaféeigar, som organiserte gambling, også vart dømd for å ha pressa andre til kriminelle handlingar.
Ressursar
– Det er eit faktum at det er personar som sjølv, frivilleg, utset seg for det. Vi må prøve å unngå at dei kjem i den situasjonen. Det krev kanskje noko meir uro frå politiet si side, seier han.
Vagle vedgår at slike saker til sjuande og sist ikkje vert prioritert.
– Det er mykje kriminalitet som føregår i byen vår, som vi gjerne skulle ha stoppa. Vi må erkjenne at vi må prioritere det viktigaste først, seier Vagle.