– To kvinner og ein mann er sikta for tjuveri og sal av narkotika, seier politiastasjonssjef i Arendal, Jan Sverre Krogstad til Agderposten.
Ifølgje avisa har ein av personane fått eit førelegg og er sleppt fri. Dei to andre vil bli vurdert varetektsfengsla torsdag.
Spana på kvinne
Dei tre personane vart pågripe i Arendal sentrum onsdag. Politiet fann til saman 160 narkotiske tablettar, 25 000 kroner og fleire smykker.
– Smykkene, som vi meiner er stolne, har vi greidd å spore tilbake til ein gjenbruksbutikk, seier Krogstad.
Pågripinga skjedde etter spaning der politiet observerte korleis ei av kvinnene gjorde avtaler med narkomane.
– Ei av kvinnene som vart arrestert hadde gøymt ein mobiltelefon under skautet. Spanarane observerte deretter ein bil som kom køyrande med varene som var bestillt. På det tidspunktet slo vi til, seier politistasjonssjefen.
Stammar frå narkosal
Krogstad seier til avisa at narkomane i byen leverer bestillingane sin på morgonkvisten. Kvinnene tek imot bestillingane. Politiet meiner at storparten av pengane som vart beslaglagt stammar frå narkotikasal.
– Alle har mobil og tilgang på bil. Vi meiner at dei får mesteparten av inntektene sine frå sal av narkotika, seier han.
Det vil bli oppnemnt forvarar for dei to personane som framleis sit fengsla.
Den eine kvinna er frå før sikta for narkotikasal etter at ho vart teke med narkotika og kontantar i mai.
Vil forby tigging
I juli kom det fram at politidirektoratet rår justisdepartementet til å forby tigging. Forslaget kom etter ei undersøkjing som viste at mange tiggarar også er kriminelle.
– Særleg i Oslo, der det ikkje er ubetydelege ordensproblem og utbreidd vinningskriminalitet knytt til tigging. Difor meiner vi at det vil vere riktig å gjeninnføre forbodet mot tigging, sa fungerande avdelingsdirektør i politidirektoratet, Kristin Kvigne til NRK.no.