Dag Vige (V) har nyleg vore i Bangladesh og viste fram måleriet som han fekk med seg frå Rajshahi i formannskapet onsdag.
Måleriet var ei gåve frå kunstnaren Ismail Hossain. Han har tidlegare laga eit stort kunstverk på idrettshallen på Odderøya, saman med assistenten sin.
– Kunstnaren var her i 2011 og ville gje ei ny gåve til Kristiansand. Det er utruleg flott laga av ein dyktig kunstnar, seier Vige til NRK.
Rajshahi har vore Kristiansand sin venneby i over 30 år. Kristiansand har samla inn fleire millionar kroner i løpet av desse åra for å gjere kvardagen litt enklare for innbyggjarane.
Pengane vert gitt til sju humanitære organisasjonar som set i verk ulike tiltak.
– Det er alt frå boring etter vatn, hjelp til folk som har det vanskeleg, det har vore laga toalettanlegg og skular, seier Vige.
18.-31. oktober i haust skal Kristiansand ha ei ny innsamlingsrunde.
– Der vil over 50 barnehagar og skular vere involverte.