– Rekorden frå i fjor på 15.400 billettar er allereie slått og det er venta at det bikkar 20.000 tilskodarar.
Det seier Thomas Schöneich i det europeiske handballforbundet, knappe to veker før det brakar laus på banen i MVM Dome i Budapest når Champions League 22/23 skal avgjerast.
Laurdag 3. juni er Vipers Kristiansand klare for sin fjerde semifinale på rad i Meisterligaen. No står Vipers føre ei utfordring få har klart før. Og dei er med på å skrive historie.
Slår herrane
For med publikumsrekord vil også ein annan viktig milepæl nåast:
– For fyrste gong i historia kan det bli fleire tilskodarar for å sjå kvinnene enn det pleier å vere under herranes finale i Köln, seier Schöneich nøgd.
Og blant publikum er fleire hundre lokale fans som tar turen frå Sørlandet.
– Vi er glade for å ta imot minst 350 Vipers-supportarar, seier han.
–Heilt fantastisk!
– Det er heilt fantastisk at i idretten vi elskar så klarer kvinnene å nå denne milepælen! Det seier ein nøgd dagleg leiar i Vipers Per Geir Løvstad.
Han viser til kor sterkt kvinnehandball står i Europa, og meiner dette er eit synleg bevis på kor langt ein kan nå dersom styresmaktene bygger ein framtidsretta arena.
– Allereie andre gongen det arrangerast finale 4 i MVM Dome, så klarar kvinnene å fylle arenaen.
Interessa frå det lokale publikummet har også vore god, seier Løvstad.
– Målet er å ha med 150 personar på flyet til Budapest og rundt 175 på returen. Då blir store deler av laget også med. Totalt sel vi 300 billettar til kampen. I tillegg kan det vere andre nordmenn som har kjøpt billett direkte i Ungarn.