– Vi gjer ein veldig god prestasjon og slår eit veldig godt lag. Dessverre slår vi dei ikkje nok til å gå vidare, men vi får ta med oss det som er veldig positivt, og det var at vi stressa dei. Det var faktisk kamp nesten heilt til slutt, seier trenar Leif Gautestad til NRK.no.
Kjempesjanse
ØIF Arendal vann søndagens returoppgjer 26-23 heime i Nedeneshallen, men hadde ni mål å ta att etter det første oppgjeret i Romania. Det betyr at Stiinta Bacau vann 56-50 samanlagt.
Men ØIF Arendal var særs nær å ta skalpen på rumenarane. Fire minutt før full tid leia ØIF med seks mål. André Jørgensen Hofstøl hadde ein kjempesjanse til å knappe innpå endå eit mål, men bomma.
– Det var ergeleg, men det er så mange slike situasjonar i løpet av to kampar, at vi ikkje skal leggje skulda på den eine, seier han.
– Samstundes er det klart at akkurat der hadde vi moglegheita, seier Gautestad.
GOD: Håvard Augensen leverte nok ein sterk kamp i ØIF-drakta. Augensen gir seg etter denne sesongen.
Foto: Sander Heggheim/NRKLever av handball
Men det er ingen grunn til å «grave seg ned» for ØIF-spelarane. Stiinta Bacau har kun heilprofesjonelle spelarar på laget, som lever av å spele handball.
– Det blir veldig spennande å sjå kor langt dette laget kan gå, seier landslagsspelar Sondre Paulsen.
– Det er vanskeleg å samanlikne med dei norske laga. Men vi skal vere nøgde med at vi vinn heime, seier Paulsen.
No rettar laget fokus mot å sikre 4. plass i eliteserien. Onsdag kjem Runar på besøk til Nedeneshallen.
– For oss er det viktig å vere topp fire og vere blant dei beste laga i Norge. Skal vi bli nummer fire må vi truleg slå Runar, seier Leif Gautestad.
KJEMPAR: André Jørgensen Hofstøl i kamp med rumenske forsvarar.
Foto: Sander Heggheim/NRK
