– For første gang har vi spelarar som kan vere med å kjempe om sigrar i kvar einaste kamp, uansett motstandar, seier Gautestad til NRK.
– Ambisjonen er å vinne noko i år. Det er vanskeleg å vinne serien, men kanskje litt lettare i cupen dersom vi er heldige med trekninga, seier han.
Onsdag kveld spelar arendalittane sin første seriekamp for sesongen. Stord er motstandar på bortebane.
Ekspertane trur på ØIF
Fleire ekspertar spår at ØIF Arendal vil vere eitt av laga som kan kjempe om medalje. Tysdag sa landslagssjef Robert Hedin at hantippar at arendalittane tek bronsemedalje i årets eliteserie.
– Vi har som regel ikkje blitt tippa heilt der opp tidlegare. Men det forsterkar trua på det vi held på med. Vi veit også at det er 8-9 andre lag som trur på det same. Det er det som er så gøy med sport, seier trenaren.
Sørlendingane har sikra seg to nye spelarar det er knytt store forventningar til denne sesongen. Islendingen Einar Ingi Hrafnsson og danske René Bach Madsen. Trenaren trur duoen blir viktige for eit lag på jakt etter suksess.
– Vi har henta to spelarar med internasjonalt nivå. Vi håpar dei blir ein viktig faktor. Einar Ingi har vist seg å vere god for oss med ein gang. René har ikkje fått trent for fullt på grunn av opptrening etter skade, så han treng nok litt tid, seier Gautestad.
– Bør slå Stord
– Eg trur vi har sikra oss to spelarar som publikum vil trykke til sitt bryst, seier han.
ØIF Arendal skal spele seks av ni første seriekampane på bortebane. Det er ikkje trenaren særleg glad for.
– Det er heilt klart ikkje bra. Det er ikkje bra for interessa å starte med to bortekampar på rad. Det gjer utfordringa større, men vi skal møte laga både heime og borte, så det vil nok jamne seg ut, seier han.
Første motstandar i eliteserien er altså Stord på bortebane. Gautestad ventar ein tøff kamp.
– Det blir ei stor utfordring. Dei har handla inn fleire spelarar som held internasjonalt nivå. Eg er veldig spent. Men skal vi vere med heilt i toppen bør vi vinne denne kampen, seier han.