ØIF slo gullfavoritt: – Eit magisk publikum hjelpte oss til siger

– Først og fremst vil eg trekkje fram eit magisk publikum. Vi kjende verkeleg trykket her. Det gjer noko med gutane, seier ØIF Arendal-trenar Marinko Kurtovic til NRK.

Laget løfta seg mange hakk frå seriepremieren der det vart tap i Bodø.

Arendalittane gjekk ut i eit forrykande tempo på heimebane og leia kampen frå start til mål.

God Medhus

Eliteserieklubben tok vare på kontringane, nekta å sleppe Elverum gjennom forsvaret, og bakerst stod keeper Svenn Erik Medhus ein særs god kamp.

I tillegg stod kaptein Eirik Heia Pedersen fram slik vi kjenner han med enorm arbeidsinnsats. Også veteranen Andre Jørgensen Hofstøl viste glimt av gammal storheit.

– To poeng heime mot Elverum er veldig sterkt. Dei er tippa i toppen i år og det er viktig å vinne denne kampen heime, seier Eirik Heia Pedersen.

– Vi har sagt at vi skal vinne alle heimekampane våre og dette er ein god start, seier kapteinen.

Irritert Kurtovic

ØIF gjekk til pause med 15-10 leiing, men fekk det tøffare i andre omgang.

– Det som irriterer meg mest er at vi ikkje leiar med meir enn fem mål. Vi kunne ha leia med 8-9 mål, seier Kurtovic.

Hedmarkingane jobba seg gradvis inn igjen i kampen, og var berre eitt mål bak då det stod att åtte minutt av kampen.

Men eit solid ØIF-forsvar og godt målvaktspel gjorde at laget heldt unna og kunne juble for siger føre 1800 tilskodarar.

Supportarar i ekstase

På tribuna kunne vi høyre jublande ØIF-supportarar rope : «rått», «sjukt» og «beste kampen eg har sett av ØIF nokon gang».

– Det er kjekt å høyre at supportarane er nøgde. Vi leverte ein solid kamp, seier ØIF-trenaren.

Neste utfordring for ØIF Arendal er bortekamp mot Fyllingen i Bergen.

– No skal vi suge litt på denne karamellen, så skal vi prøve å ta Fyllingen i neste kamp, seier han.