– Det er situasjonen på heimebane og kor mykje tid handballen tek som gjer at eg gir meg. Så fann eg ut at det ikkje fins betre tidspunkt å gi seg på enn med seriegull og eit cupmeisterskap i lomma. Timinga var perfekt, seier han til NRK.
Jørgensen Hofstøl legg ei innhaldsrik handballkarriere bak seg. Han har spelt over 100 landskampar for Norge. I tillegg fekk han proffdraumen oppfylt.
Levde ut proffdraumen
36-åringen starta utanlandskarriera i spanske C.D. Bidasoa der han var i tre sesongar. Seinare gjekk turen til Aalborg der han var i tre sesongar.
Jørgensen Hofstøl var i danske GOG Svendborg TGI i ein sesong. Då klubben vart slått konkurs signerte han for ØIF Arendal.
Der fekk han oppleve å vinne både serie og cup denne sesongen.
– Det betyr veldig mykje for meg. Det var jo det eg drøymde om då eg flytta heim frå utlandet. Å vinne noko med ØIF har motivert meg og var målsettinga då eg kom heim, seier han.
Men det er ein landskamp han dreg fram som sitt høgdepunkt i karriera. Han vart kåra til banas beste spelar i ein VM-kamp mot Danmark i Tyskland.
– Vi spelte føre 10 000 tilskodarar der halvparten var nordmenn. Eg spelte ein god kamp. Det er nok høgdepunktet, seier han.
Fredar draktnummeret
ØIF Arendal har bestemt seg for å frede draktnummer 33 når Jørgensen Hofstøl no gir seg.
– Andre er ei legende og nummer 33 vil for all tid vere freda. Eg er ikkje sikker på at vi hadde vore der vi er i dag utan han. Han er mykje viktigare for laget enn mange kanskje vil tru, seier sportsleg leiar Per Carsten Michelsen til NRK.
Jørgensen Hofstøl vil bli heidra på eit arrangement med klubben fredag kveld. Han utelukkar ikkje at han vender tilbake til ØIF i ei anna rolle seinare.
– I første omgang gir eg meg heilt. Men når hausten kjem får vi sjå kva det blir til, seier han.