NRK Meny
Normal

ØIF klar for sluttspelet: – Utruleg, sinnsjukt deilig

(ØIF ARENDAL - BÆKKELAGET 22-19): ØIF Arendal er klar for sluttspelet i handball for herrar. Laget slo bronsevinnar Bækkelaget i siste serierunde.

– Det er kjempedeilig. Utruleg sinnsjukt deilig. Heilt vanvittig, seier Sondre Paulsen til NRK få minutt etter kampslutt.

Med tap mot Bækkelaget kunne arendalittane ha måtte spelt kvalifisering for å behalde plassen i eliteserien.

I serieavslutninga var Bækkelaget på besøk i Sør Amfi. Oslo-klubben hadde sikra bronsemedalje allereie før kampen, og hadde i praksis ingenting å spele for.

Slo tilbake mot kritikarane

Det var veteranane Andre Jørgensen Hofstøl og Svenn Erik Medhus som tok ansvar føre 1174 tilskodarar i Sør Amfi. Målvakt Medhus stengde buret, medan Jørgensen Hofstøl både scora og var sentral i angrepsspelet.

Asle Gran, ØIF Arendal

Trenar Asle Gran var strålande nøgd etter sigeren mot Bækkelaget.

Foto: Sander Heggheim/NRK

– Eg har tenkt så mykje på situasjonen klubben har vore i den siste tida. Eg har nesten hatt vondt i hovudet. Det er utruleg deilig å vise alle som ikkje har hatt trua på oss at vi faktisk kan, seier Paulsen.

Defensivt var svenske Kenny Ekman tilbake i storform etter ein sesong der ØIF ikkje har prestert etter forventningane.

– Tøft og krevjande

Asle Gran tok over trenaransvaret i klubben etter at Leif Gautestad fekk sparken i desember. Hans oppgåve var å redde klubben frå nedrykk.

– Det har vore tøft og krevjande. Det er spesielt krevjande når klubben har prestert dårleg og har plukka lite poeng. Faren for nedrykk og kvalifisering har vore der heile tida. Å klare sluttspel til slutt er vanvittig deilig, seier Gran til NRK.

– Kvar legg de lista i sluttspelet?

– Det veit eg ikkje enno. No skal eg feire dette, så får vi sjå etterkvart, seier han.

ØIF Arendal møter serietoar Elverum, Bodø og Bækkelaget i kvartfinalane. Dei to beste laga i gruppa går vidare til semifinale. I den andre gruppa skal Haslum, Fyllingen Bergen, Runar Sandefjord og Stord kjempe om to semifinaleplassar.

ØIF Arendal er klar for sluttspelet i handball for herrar. Laget slo bronsevinnar Bækkelaget i siste serierunde.

Kampbilder med tillatelse fra TV2 Sumo