Ny Start-trenar kan få all makt

Dermed kan Start gå for den same modellen som Molde og Viking har gjort. Etter at Egil Østenstad trekte seg for ein månad sidan fekk trenar Åge Hareide ansvaret både på treningsfeltet og hovudansvaret for kjøp og sal av spelarar. Det same ansvaret har Molde-trenar Ole Gunnar Solskjær.

• LES: No er målet å overleve for Start

Utan sportssjef

– Det Molde har gjort, den europeiske modellen, fremjer ein ekstra finansieringsmodell. Slik vert det ikkje hos oss. Men uansett vil den nye trenaren som vert tilsett får mykje ansvar og stor medbestemmelse, seier Hovstad til Fædrelandsvennen.

• LES: Start skal forsterke stallen

– Så kjem det an på kva trenaren sjølv ynskjer. Nokon ynskjer å kun vere på treningsfeltet, medan andre vil ha meir innflytelse, seier han.

Etter at Svein Mathisen døydde i januar i år, har Start stått utan ein sportssjef. Knut Tørum bar delar av denne jobben på sine skuldre til han sa opp trenarjobben for kort tid sidan.

Frode Fredriksen har hatt trenaransvaret i klubben sidan Tørum sa opp. I eit intervju med NRK.no tidlegare sa Sveinung Hovstad at Fredriksen kan vere ein av kandidatane til å ta over trenarjobben. Det kan og bli aktuelt at Fredriksen leiar klubben ut sesongen, medan leiinga jaktar ein ny permanent trenar.

Nils Arne Eggen?

– Ja, det er heilt klart eit alternativ, men vi diskuterer andre løysingar også, og det er Frode Fredriksen veldig innforstått med, sa Hovstad til NRK.no.

• LES: Ny back klar for Start
• LES: – Start rykkjer ikkje ned

Den siste tida har fleire trenarnamn svirra på Sørlandet. Ei oversikt Fædrelandsvennen presenterte onsdag innheldt namn som Nils Arne Eggen, Tom Nordlie, Steinar Nilsen og Mons Ivar Mjelde.

Klubben er i full gang med å finne Tørum sin erstattar, og håpar altså å ha avklara trenarsituasjonen før haustsesongen tek til.