I perioden 2013 til mai i fjor stal mannen TV-produksjonsutstyr til over 800 000 kroner frå NRK.
Mannen jobba som tilkallingsvikar i NRK Sørlandet i ein kort periode.
Ved fleire høve lurte 28-åringen resepsjonsvakta til NRK på Marienlyst i Oslo til å tru at han hadde eit ærend på utstyrslageret på Marienlyst.
Gjekk med NRK-klede
Mannen stal også utstyr frå NRKs lokalkontor i Kristiansand for fleire titals tusen kroner.
Sørlendingen hadde på seg NRK-klede og hadde også med seg eit utdatert adgangskort då han kom seg inn på lageret.
– Vi har stramma inn sikkerheitsrutinane i etterkant av dette, seier sikkerheitssjef i NRK, Reid Downie.
I 2013 lånte han også utstyr hos TV2 til 330 000 kroner. Mannen returnerte ikkje utstyret til TV-kanalen.
Mannen stal både kamera, linser, lys- og teknisk utstyr.
Selde utstyr
Tre gonger selde han også utstyr, som han tidlegare hadde stole, til privatpersonar.
Aftenposten skreiv i fjor at politiet fann til saman 49 gjenstandar under ei ransaking heime hos mannen.
Mange av gjenstandane var merka med NRK eller TV2. På ei anna adresse vart det funne ytterlegare ti gjenstandar, skreiv avisa.
Mannen er i Aust-Agder tingrett dømd til sju månaders fengsel. To av månadene er betinga med ei prøvetid på to år.
– Han er nøgd med dommen
Den tidlegare NRK-vikaren tilstod alt i tingretten.
Mannen må også betale erstatning på over 130 000 kroner til personane han selde det stolne utstyret til.
NRK har vore i kontakt med 28-åringen, som henviser til sin advokat Ole Joakim Devold.
– Dommen var som forventa. Første inntrykk eg fekk er at han er nøgd, men han beklagar sjølvsagt sterkt det han har gjort, seier Devold.