– Der kjem skodespelaren, sa Tom Nordlie då han fekk auge på Start-spissen etter kampslutt.
Nordlie sitt Lillestrøm hadde akkurat tapt 1-2 i den første av to kvalifiseringskampar om retten til å spele i eliteserien neste sesong.
– Det er det dummaste eg har sett, Ramsland, heldt Nordlie fram.
– Då har du ikkje sett mykje. Tull, svara sørlendingen.
– Eg er forbanna
Situasjonen Nordlie reagerte på skjedde ni minutt ut i andre omgang. Lillestrøm leia 1-0 då Martin Ramsland gjekk i bakken innanfor 16-meteren.
Dommar Trygve Kjennsli peika på straffemerket. Straffa sette Aron Sigurdarsson sikkert i mål.
– Tom Nordlie har vore med i fotballen i mange år. Slik er gamet. Det er lov å vere bitter etter å ha tapt ein fotballkamp, sa Ramsland.
– Eg er ikkje bitter. Eg er forbanna, kontra Nordlie.
Men dommar Trygve Kjensli er ikkje einig med Lillestrøm-trenaren.
– Eg forstår straffa har vore diskutert, men den kan vi stå inne for. Lillestrøm-spelaren har to hender rundt han. Ramsland får ein vridning og straffa er klar i mine auge, seier Kjensli som også dømde sin siste kamp på toppnivå.
Snudde kampen
Straffescoringa snudde kampen for Start. Etter at Gustafsson sende bortelaget i leiinga midtvegs i andre omgang tok Start over spelet då Sigurdarsson utlikna til 1-1.
20 minutt seinare la same mann på til 2-1. Start hadde snudd kampen på heimebane.
Dermed er det Start som er i førarsete før returkampen på Åråsen onsdag i neste veke.
– Vi ligg under, men vi fekk eit bortemål. Kampen er ikkje i nærleiken av avgjort. Vi skal ta dette på Åråsen, seier Lillestrøm-spelar Thomas Lehne Olsen.
Det var ampert også før kampstart i Kristiansand laurdag. Fleire supporterar var involvert i ein slåstkamp i sentrum.