Nedrykksdramaet: – Liten fordel oss – NRK Sørlandet

Hopp til innhold

– Vi er betre stilt no enn før kampen. Start har veldig tøffe kampar, men når det er sagt skjer det alltid noko rart på slutten. Men eg trur vi har ei litt betre moglegheit enn Start, seier Mjøndalen-trenar Vegard Hansen til NRK.

Det vart på førehand omtala som skjebnekamp og kampen ingen av laga hadde råd til å tape.

Oppgjeret mellom Start og Mjøndalen enda uavgjort 1–1. Dermed ligg Start framleis på kvalifiseringsplass eitt poeng føre Mjøndalen med to kampar att. Men i Mjøndalen-leiren meiner dei at eitt poeng var godt nok i Kristiansand.

Les: – Går fortsatt for sikker plass

– Hadde vore ferdig med tap

Hansen vedgår at han ikkje tok nokon sjansar i sluttminutta.

– Det var veldig viktig å ikkje tape. Då hadde vi så å seie vore ferdige, seier han.

Hansen får støtte av Christian Gauseth i at Mjøndalen er i førarsetet før dei to siste serierundane.

– Vi har ein lettare heimekamp enn Start. Ein liten fordel oss, men den er ikkje stor, seier han.

I neste serierunde skal start møte eit Stabæk-lag på medaljejakt på Nadderud medan Mjøndalen tek imot Aalesund på heimebane. I siste serierunde får Start besøk av Molde medan Mjøndalen møter Viking på bortebane.

Les: Kunstscoring berget eliteseriehåpet for Start

– Ei stor utfordring

Start-trenar Bård Borgersen vedgår at det blir tøft for Start å sikre kvalifiseringsplass eller sikker plass.

– Det er ei stor utfordring for oss. Eg trur vi berre skal konsentrere oss om å spele neste kamp og prøve å ta tre poeng der, svarar Borgersen på spørsmål om han trur laget klarer å sikre plassen.

Start-sjefen hadde ikkje takka ja til kvalifiseringsplassen om han hadde fått tilbod om den to serierundar før slutt.

– Nei, vi vil helst halde oss direkte, seier han.