– Eg er heilt klart utruleg skuffa, men veit ikkje kva eg skal tenke. Eg har blitt orientert om dette i ettermiddag. Eg har ikkje klart å fordøye resultatet endå, seier Rasmussen til NRK.
Ho er mor til Tina Jørgensen som vart drepen 24. september år 2000.
- Les meir: Alt om drapet på Tina Jørgensen
Forvrengt bilete
Spesialistar innan psykiatri har vurdert den mentale helsetilstanden til ein av dei sikta i Tina Jørgensen-saka.
Dei har konkludert med at 37-åringen frå Lyngdal har eit forvrengt bilete om at han og tre kameratar var delaktige i drapet på Tina Jørgensen.
Den 84 sider lange rapporten baserer seg hovudsakeleg på samtalar to rettspsykiatrar har hatt med 37-åringen.
Det er politiet som har bede om ei vurdering av hans mentale helsetilstand.
Falskt minne
I eitt av dei åtte punkta i konklusjonen står det følgjande:
«Vi antar, etter en analyse av hele sakskomplekset, at observanden har utviklet falske minner i forhold til de påklagede handlinger.»
– Falskt minne er noko nytt å ta omsyn til, og eg veit faktisk ikkje kva eg skal meine om dette. Eg har sjølvsagt ein del spørsmål, seier Austdal Rasmussen.
– Eg kan dessverre ikkje seie noko meir no. Eg må få la dette falle inn, seier ho.
Ber politiet henlegge saka
Odd Rune Torstrup forsvarer den sikta mannen frå Lyngdal. Trass i at klienten har gitt detaljerte forklaringar i avhøyr, der han peikar ut den eller dei som står bak drapet, meiner advokaten at saka må henleggast.
– Det er ingen bevis som tilseier at forklaringane hans i avhøyr er riktige. Då gjer konklusjonen seg sjølv: nemleg at saka må henleggast, sa Torstrup til NRK måndag kveld.
Det har ikkje politiet nokon kommentar til.
– Vi har ingen kommentar til om saka nærmar seg ein eventuell henleggelse. Vi etterforskar saka, og eg vil gå gjennom alle bevis når saken er ferdig etterforska, seier politiadvokat i Rogaland politidistrikt, Herdis Traa.