– Akkurat no gler eg meg til å sove i natt. Eg har hatt adrenalin heilt sidan den første kampen mot Vipers vart blåse av, seier Anja Hammerseng-Edin til NRK etter å ha slått Vipers på heimebane og sikra finaleplass i sluttspelet.
– Det var heilt forferdeleg søndag. Vi var så sure og flaue. Det var pinleg, seier Larvik-keeper Sandra Toft.
- Les også: Slo Larvik i tre av fire omganger
Slo Larvik mot alle odds
Søndag sjokkerte Vipers Kristiansand med å slå Larvik heime i Aquarama i den første av to semifinalar. Dette var vestfoldingane sitt første tap på eitt år.
– Det var den lengste bussturen eg har vore med på nokosinne. Det vart ikkje sagt eit ord, seier ho.
I returkampen i Larvik tysdag kveld vart det eit heilt anna Larvik-lag som gjekk på bana. I første omgang styrte dei absolutt alt og viste at dei er eit langt betre lag enn Vipers.
No vedgår dei at tankane var ein annan stad under kampen i Kristiansand søndag. Nemleg i Budapest der dei møter russiske Dinamo-Sinara i semifinalen i Meisterligaen laurdag.
– Det trur eg og det er naturleg. Eg gler meg noko heilt vilt til søndag, seier Toft.
– Det kan nok vere at semifinalen i Meisterligaen låg litt i bakhovudet. Men samstundes veit vi at vi må vere klare til kamp i den norske serien også, seier Marit Malm Frafjord.
Skryt av Vipers
Larvik-trenar Ole Gustav Gjekstad merka at spelarane hadde semifinalen i den gjævaste europacupen i tankane i Kristiansand.
– Slik skal det vere også. Det er såpass viktig for oss at det må ligge litt der i forhold til disponering, trening og fysisk oppkøyring. Vi gambla litt der, men det gjekk heldigvis bra, seier Gjekstad
– Men vi har ingenting å skulde på for det tapet. Det var berre ikkje godt nok av oss. Så må vi også hugse på at Vipers var gode i den kampen, seier han.
Keeper Sandra Toft gjekk av bana mot Vipers med ein lyskeskade, men er fast bestemt på å rekke semifinalen laurdag.
– Om eg så hadde knekt foten hadde eg spelt laurdag. Eg gler meg heilt vilt. Det er min første sesong i Meisterligaen og så skal eg spele semifinale. Eg gler meg sånn, seier ho.