– Eg kan ikkje sjå at det ligg an til særleg bygeaktivitet før langt, langt ut i neste veke, seier statsmeteorolog Kristen Gislefoss til NRK.
Statsmeteorolog Kristen Gislefoss.
Foto: Kaland, Ole / NRK– Ferierande vil nok nyte godt av finvêret. Dei som ynskjer litt meir vete ovanifrå må nok sjå langt etter den type vêr med det første, seier han.
Varmerekordar og tropenetter
Det har allereie vore ein fantastisk sommar vêrmessig. Strålande sol og høge temperaturar har nærast gitt sydenstemning mange stader i landet.
Ved Lindesnes fyr har det vore målt to tropenetter så langt denne sommaren.
I Ulvik i Hordaland vart det sett ny varmerekord 10. juli då det vart målt 34,4 grader. Det er den høgste temperaturen som er målt i Hordaland på 125 år.
Statsmeteorolog Kristen Gislefoss fortel at det blir høge temperaturar på Sørlandet i mange dagar framover.
– Fredag vil nok temperaturen gå over 20 grader. Kanskje 22–23 grader i makstemperatur. Vi bør i alle fall komme der i dag, og kanskje litt høgare, seier han.
Kan bli over 25 grader
Hynnekleiv i Froland og Landvik i Grimstad var dei varmaste stadene på Sørlandet torsdag.
Ifølgje Gislefoss kan vi vente endå høgare temperaturar i løpet av helga.
– Temperaturen vil stige gradvis. Mot siste del av helga er det ei god moglegheit for å komme opp mot 25 grader i makstemperatur rundt Kristiansand, seier statsmeteorologen.
– Litt lengre inn frå kysten vil temperaturen kanskje bli endå høgare, seier han.
