– Det kjem til å bli veldig jamt. Eg har eit indre mål om å klare medalje. Men så lenge eg persar og spring mitt beste kan eg ikkje gjere noko meir, seier Meinseth til NRK.
Sørlendingen har den 6. beste tida i Europa på 200 meter for juniorar. Før han på lista ligg fem frå Storbritannia. Men det er berre lov til å stille med tre løparar frå kvar nasjon. På papiret er dermed Meinseth ein av dei store medaljefavorittane.
Droppa 100 meter
– Finalemoglegheitene er i alle fall ganske store om eg presterer opp mot mitt beste, seier han.
Fredag klokka skal mennene springe forsøksheat på 200 meter. Dersom Meinseth går vidare skal han springe finale laurdag ettermiddag.
– Eg trur at forma er veldig bra. Det har verka slik på trening. Det blir spennande å sjå kor fort det går i forsøket, seier han.
Onsdag fortalde NRK at Meinseth valde å droppe 100 meter for å vere best mogleg budd til 200 meteren.
– Det er ganske tett program i eit meisterskap som går over fire dagar. Eg har betre sjanse til å hevde meg på 200 meter. Sidan 100 meteren går først har eg valt å droppe den, sa Meinseth onsdag.
Per i løp etter løp
Meinseth har teke store steg som sprintar denne sesongen. Han har sett ny personleg rekord i nesten kvart einaste løp.
19-åringen sjølv er overraska over det han har prestert.
– For eitt år sidan hadde eg ikkje sett føre meg at eg kunne vere ein medaljekandidat i EM. Men eg har jobba målretta og trudde eg skulle få framgang, men kanskje ikkje så mykje, seier han.