NRK Meny
Normal

Trafikkuhell og brann førte til køkaos

Eit trafikkuhell på E18 i Kristiansand og ein leilegheitsbrann tidlegare på dagen skapte lange køar i austgåande retning ut av byen.

Kø på E18 i Kristiansand

Det oppstod lange køar på E18 etter brann og trafikkuhell onsdag ettermiddag.

Foto: Anne Wirsching/NRK

– Folk må rett og slett vere tolmodige. Det er det einaste som hjelper, sa operasjonsleiar i Agder-politiet, Per Kristian Klausen til NRK.

Det heile starta litt over klokka 15 då det braut ut ein brann i eit leilegheitsbygg i Østerveien like ved Lundsbrua i Kristiansand.

Brannen førte til at trafikken stod stille i ein periode. Politiet opna etter kvart eitt køyrefelt.

Ein time seinare var tre bilar involvert i eit trafikkuhell ved Vollevannet på E18. Dette førte til at trafikken stod bom stille ut av byen.

Like før klokka 17.30 melde politiet at bilane var fjerna frå staden og at vegen var open igjen.

Ingen personar vart skada i ulykka. Ein person vart send til sjukehus for sjekk etter brannen i Østerveien.

Laster kart, vennligst vent...