Laila Bertheussen debuterer med kunstutstilling under Arendalsuka

15. august opnar utstillinga hennar som har fått namnet «PUBLIC ENEMY», skriv Aftenposten.

Sjølvlaga tøyvesker

Ifølgje ei pressemelding avisa refererer til, er utstillinga inspirert av Bertheussen sine eigne erfaringar frå politiet og søkjelyset til media, dommen mot henne og soninga i fengselet på Bredtveit.

Under rettssaka mot Laila Anita Bertheussen dukka ho opp med eigenlaga tøyvesker med tekst og symbol. Bertheussen har halde fram med syinga i fengsel.

Kunstnarisk leiar for prosjektet, Morten Traavik, seier at Bertheussen førebels ikkje vil snakke med pressa. Ho har likevel delt ei fråsegn i samband med pressemeldinga. Der seier ho mellom anna:

«Snart er eg ferdigsona, alle lenkjer er av og kven veit kva som då vil skje».

Gamle og nye verk

Ifølgje Traavik får ein i utstillinga under Arendalsuka mellom anna sjå gamle og nye vesker. I tillegg skal utstillinga innehalde ny grafikk, måleri og mixed-media-installasjoner.

Det er førebels ikkje avgjort om Bertheussen sjølv vil vere til stades under utstillinga.

Dømd til fengsel

Laila Bertheussen vart dømd til eitt år og åtte månaders fengsel for åtte tilfelle av truslar mot sin dåverande sambuar og justisminister Tor Mikkel Wara (Frp), hans partifelle og regjeringskollega samfunnstryggleiksminister Ingvil Smines Tybring-Gjedde og ektemannen hennar, stortingsrepresentant Christian Tybring-Gjedde (Frp).