– Vi har vore gjennom ein sommar med veldig låge prisar. Sjølv om det er vanleg at prisane går opp på hausten, er dei lågare enn normalt på denne tida, seier administrerande direktør i LOS, Geir Tønnesland.
Faktisk såg kraftselskapet seg nøydde til å senke straumprisen.
– Med tanke på mykje nedbør og godt med tilgjengeleg kraft sette vi ned prisen ein periode. Det gjer vi normalt ikkje om hausten, seier han.
Men straumkundar må rekne med å betale meir for straumen etterkvart.
– Alt tyder på det. Både historisk sett, det blir kaldare og då aukar forbruket, som gjer at prisen vil stige. Men eg kan berolige kundane med at vi ikkje vil sjå ekstremprisar, seier han.