Kraftig vind skapar trøbbel for alpinsenter

På Hovden er det vind som skapar problem.

I Sirdal gjer både kraftig vind og tett tåke at stolheisen ikkje går.

– Vi har hatt ein del vind frå sør. Då treff den rett inn i stolheisen frå sida. Då er det fare for avsporing, seier dagleg leiar i Tjørhom og Ålsheia skisenter i Sirdal, Øystein Tjørhom til NRK.

Har sendt ut obs-varsel

I Sirdal har det blese 15-16 sekundmeter på det meste.

– Det er litt vindfullt, men det er ikkje veldig farleg, for dei andre heisane går jo, seier Tjørhom.

Meteorolgisk institutt har nå sendt ut eit obs-varsel for Sør- og Vestlandet.

Dei melder at det kan bli lokalt vanskelege køyreforhold laurdag kveld som følgje av kraftig vind og snø.

– Vi sender ut eit obs-varsel, særleg fordi det er påske og vi veit at det er mykje folk i fjellet, seier vakthavende meteorolog Berit Hagen ved Meteorologisk institutt til NTB.

• Les: – Ver varsam og ikkje ta sjansar i fjellet

Stengt i heile dag

I Sirdal vil stolheisen vere stengt i heile dag.

– Det er ikkje håp om at den opnar att i dag. Vi vil oppdatere så raskt vi har fått ein liten rapport på morgonkvisten i morgon, seier Tjørhom.

Dei to største alpinsentera på Sørlandet har hatt ei særs god påske til no.

På Hovden vart det sett ny besøksrekord fredag. Då var 3300 menneske innom alpinsenteret.

I Sirdal løyste over 2000 billett same dag.