Brannen vart meld klokka 00.13, og politiet fekk varsel om fleire smell frå brannen. Næringsbygget vart raskt overtent, og sløkkinga vart vanskeleg.
Det brann kraftig og lenge hadde ikkje brannfolka kontroll.
Ved totida sa operasjonsleiar Øyvind Hægeland i politiet i Agder til NTB at dei måtte satse på ei kontrollert nedbrenning.
Starta i flissilo
110-sentralen i Agder melde på Twitter at brannen i trevareverkstaden kan ha starta i ein flissilo på enden av bygget, og brannen spreidde seg derfrå til produksjonslokalet som ligg i ein stor hall.
Like før klokka 1 varsla politiet at rundt 10 bebuarar i tre nabohus vart evakuerte fordi det fall mange gneistar ned i området.
Krevjande sløkking
Innsatsleiar for brannmannskapa, Dag Svindseth, seier til NRK at brannfolka frå Arendal fekk hjelp av mannskap frå Froland og Tvedestrand i sløkkinga.
– Det var ekstremt krevjande. Vi vart møtt av full fyr i verkstaden, og konsentrerte oss om å forsøke å redde storhallen. Men med så mykje trevarer vart det stor varme, og det spreidde seg raskt, fortel han til NRK.
Dramatisk evakuering
Ei av dei evakuerte, Hanna Helene Haldorsen Hondrum, opplevde evakueringa som dramatisk.
– Eg vart vekt av pappa etter at politiet kom til huset vårt. Då såg eg brannen ut av vindauget, og vi måtte pakke og ta med hunden vår. Så sto eg ute og såg på brannfolka, fortel ho til NRK.
Ved tretida fekk bebuarane beskjed om at dei kunde vende heim att. Då meinte brannfolka at det ikkje lenger var fare for spreiing av brannen.