Kongo-mødrene fortvila over UD

– Vi er fortvila. Det første møtet i juni førte ikkje fram. Det er ikkje noko lys i tunnelen, seier Mathilde Moland til Dagbladet.

– Fins moglegheiter

– Hadde vi hatt ein dato å forholde oss til, hadde vi visst når dei skulle blitt utlevert, ville ting vore enklare. Slik det står no kan det vere til jul, om eitt år, om to år. Vi veit ikkje, seier ho.

Moland og French sit fengsla på tredje året i Kongo, etter at dei vart dømde for drap på ein sjåfør. Kari Hilde French meiner at UD ikkje tek nok initiativ i saka.

– Eg etterlyser meir kreativitet hos UD. Det er viktig at dei brukar alternative kanalar for å nå president Kabila. Personlege kontaktar er veldig viktig i Afrika. Det fins ein del moglegheiter som Norge ikkje har brukt, seier ho til avisa.

Slit med sjukdom

UD svarar slik på kritikken får mødrene:

– Vi er ikkje einig i at UD har gjort for lite i saka, seier kommunikasjonsrådgjevar Hanne Melfald.

Dagbladet skriv at dei to dødsdømde nordmennene slit med sjukdom. Joshua French har ein alvorleg halsbetennelse.

I tillegg deler dei rom med fleire andre i 30–35 varmegrader. Dei to sit fengsla i hovudstaden Kinshasa. Forholda vert beskrive som særs tøffe.