– Vi leverer ein veldig god kamp. Eg er stolt over kampen. Vi spelar vår klart beste kamp medan eg har vore med Kolstad, seier trenar Christian Berge.
– Var dette tronskiftet i norsk herrehandball?
– Det får vi sjå ein gang i framtida. I dag skal vi nyte denne, så får vi jobbe på. Så kjem det fleire titlar som skal delast ut denne sesongen, seier Berge.
Elverum har vore det beste laget i Noreg i fleire år, og hadde vunne cupfinalen fire år på rad.
Men denne gangen gjekk det «åt skogen».
Kolstad har fossa gjennom eliteserien denne sesongen, der dei har vunne alle kampane.
I søndagens cupfinale i Arendal sende dei Elverum heim til skogs med sølvmedalje i bagasjen.
Tidlegare landslagssjef Christian Berge sine menn vann cupfinalen og sikra med det klubbens første tittel.
Tobias Grøndahl (sitjande) og Elverum har vore suverene i Noreg i fleire år. Søndag fekk dei bank mot Kolstad i cupfinalen.
Foto: Christoffer Andersen / NTBFekk knallstart på kampen
Trønderane fekk ein draumestart på cupfinalen i Sør Amfi i Arendal.
Keeper Torbjørn Bergerud stengde målet, medan angrepsspelet var like presist som dei mest skotsikre elgjegerane i Elverum.
Åtte minutt ut i omgangen fossa Sigvaldi Björn Gudjonsson i angrep og sette inn 5-1 til trønderane. Sigersvande Elverum vart nærast som statistar å rekne.
Tobias Grøndahl og Elverum kraup opp igjen i ryggen og var berre to mål bak ti minutt seinare.
– Det verste som fins er å tape ein finale. I dag er vi rett og slett ikkje gode nok til å ta gull. Kolstad vinn fortent. Slik er det dessverre, seier Grøndahl.
Men raudtrøyene frå Trondheim klarte å halde på luka, og gjekk til pause i leiinga 16-13.
Også i andre omgang var det Kolstad som køyrde kampen. Fem minutt ut i omgangen leia dei 20-15.
– Skarpare enn oss
Elverum kjempa og gjorde det dei kunne, men det var ikkje nok mot gullkåte trønderar i Kolstad.
– Kolstad er rett og slett skarpare enn oss i dag, seier Elverum-trenar Børge Lund.
Midtvegs i omgangen leia Kolstad med sju mål. Tre minutt før slutt sette Simen Ulstad Lyse spikaren i kista då han hamra inn Kolstad si 33. scoring til 33-27.
Kolstad vann til slutt komfortabelt 34-27.
– Det smakar veldig godt. Eg gjekk tilbake til å bli klubbetrenar att fordi eg sakna den daglege drifta, jobbe med teamet og utvikling kvar dag. Så skal vi bli endå betre, seier Christian Berge.
Børge Lund: – Himmel og hav
Elverum-trenar Børge Lund var skuffa, men fatta etter cupnederlaget.
– Skilnaden på sølv og gull er himmel og hav. Vi hadde ynskt og drøymt om å stå att med gullet. Men eg tykkjer Kolstad er sparpare og betre enn oss. Dei vinn fortent. Vi prøver alt vi kan, seier Lund.
– Markerer dette eit tronskifte i norsk herrehandball?
– Det må vi sjå. Markeringa har kanskje, i alle fall i media blitt lyst ut med spelarane dei har henta inn neste år, og alle millionane dei får inn. Vi må ha fokus på oss sjølve og utvikling, seier han.
Fekk betalt for millionsatsing
Kolstad satsar millionar av kroner for å bli eit av dei beste laga i Europa.
Dette var altså den hardtsatsande klubben sin første tittel nokosinne.
Men mykje tyder på at det kan bli meir Kolstad-jubel denne sesongen. Klubben toppar som nemnt eliteserien.
I tillegg kjem seriesluttspelet mot slutten av sesongen, der det også skal delast ut gullmedaljar.
