Personane skal ha brukt kniv under ranet.
Ifølgje politiet stakk ranarane av i ein kvit varebil etter ranet som skjedde i 17.30-tida. Kring ein time seinare vart dei tre arresterte ved Hompland i Lyngdal.
NRK får opplyst at dei tre personane køyrde av vegen på ein blindveg like før dei vart arresterte. Dei skal også ha vore rusa.
Etter det NRK kjenner til skal dei tre vere i 20-åra.
To tilsette på jobb
– Ranarane har fått med seg kontantar, øl og tobakk, seier operasjonsleiar Øyvind Hægeland til NRK.
Politiet sette inn alle ressursane i nærområdet for å prøve å få tak i ranarane som stakk frå staden.
Det var to tilsette i butikken då ranet skjedde. Desse er no tekne med til avhøyr.
– Ingen av dei er fysisk skada etter ranet, seier Lene Simonsen som er tryggingsansvarleg i Kjøpmannshuset som driv Joker-butikkane i Norge.
Simonsen seier at dei har sett i verk tiltak for å vareta dei to tilsette.
– Det er til dømes snakk om krisepsykiatrisk hjelp. Etter ei slik hending kan du oppleve å få ein reaksjon i ettertid. Det handlar om å førebyggje det, seier ho.
Få Joker-ran
Simonsen seier at det er særs sjeldan at Joker vert utsett for ran.
– Vi har kanskje eitt eller to tilfelle i løpet av eit år. Vi har sikra oss godt og har gjort ulike tiltak for å hindre ran, seier ho.
– Er det overvakingskamera i denne butikken?
– Det har eg ikkje oversikt over akkurat no. Det varierer litt frå butikk til butikk, men dei fleste butikkane har overvakingskamera, seier ho.
NRK har vore i kontakt med styreleiar Per Espeland i butikken. Han vil førebels ikkje seie noko om det som har skjedd.