No trur både spelarar og trenar Kenneth Gabrielsen på eliteseriemedalje, som er målet denne sesongen.
– Vi har slått Storhamar, Tertnes og Byåsen både heime og borte. Då luktar det faktisk moglegheit for ein medalje. Vi skal jobbe hardt for det, seier Gabrielsen til NRK.
Kom skeivt ut
Som tidlegare denne sesongen kom Vipers Kristiansand dårleg i gang. Storhamar sette sjansane sine, samstundes som Vipers sløsa.
Laget kan takke keeper Sakura Hauge for at Storhamar ikkje kom meir enn tre mål føre tidleg i første omgang.
Men Vipers la etter kvart slurvet til side og kjempa seg inn igjen. Laget leia 12–11 til pause.
I andre omgang var det eit langt meir aggressivt Vipers-lag som kom på bana. Rosatrøyene tok styringa og vann til slutt 30-26, og sikra to særs viktige poeng i medaljekampen.
– Det ligg veldig i våre hender no. Vi har ein del tøffe kampar igjen og må jobbe vidare. Men medalje er absolutt mogleg no, seier Linn Jørum Sulland.
Klatra til andreplass
Sigeren betyr at Vipers klatra opp på andreplass på tabellen. Glassverket spelar mot Tertnes seinare onsdag kveld.
Dersom dei vinn, vil dei dytte sørlendingane ned igjen på 3.-plass.
Også strekspelar Kari Brattset trur at laget når målet om å ta medalje denne sesongen.
– Eg gjer jo det. Må innrømme det. Men eg torer ikkje heilt å tru på det før vi står der med medalje, seier Brattset.
I neste serierunde skal Vipers til Bærum for å møte Stabæk. Før jul tapte Vipers heime mot Stabæk.
– Vi skal vinne den kampen og er revansjesugne. Det viktigaste er det vi gjer kvar einaste dag, og det er å få utvikling i laget, seier Gabrielsen.