– Heilt vanvittig som vi sløsar med sjansane

– Det er heilt vanvittig som vi sløsar med sjansane. Vi skyt keeperen deira i verdsklasse, seier ØIF-kaptein Eirik Heia Pedersen til NRK.

Kristian Kjelling var ubesigra som Drammen-trenar før han besøkte serieleiar ØIF Arendal på Sørlandet.

Den tidlegare landslagsstjerna hadde leia eit Drammen-lag i poengnaud til ein siger og ein uavgjort før møtet med serieleiar ØIF Arendal.

– Vi visste sjølvsagt at dette kom til å bli tøft. At vi karrar oss tre mål bak er ikkje så gale, seier Kjelling.

Svak kamp

ØIF vann til slutt 19-16, men sigeren kunne like gjerne ha blitt med tilbake til Drammen.

1700 tilskodarar var vitne til den svakaste kampen i Sør Amfi på lang tid, i alle fall i angrep.

ØIF-trenar Marinko Kurtovic ser likevel ikkje heilt mørkt på det.

– Ser du på forsvarsspelet ser det særs pent ut. Vi leverer utruleg bra i forsvar og keeper. Det har vi terpa på heile veka, seier Kurtovic.

For enkelt

I første omgang såg det nærast ut til at laga var vaksinert mot scoringar. Drammen gjekk 17 minutt utan scoring. I 11 minutt fekk ingen av laga nettkjenning.

– Drammen sin keeper spelar sitt livs kamp. Det gjer våre spelarar litt utrygge. Vi skyt for enkle skot, men det gjer Drammen også, seier Kurtovic.

– Det er dei to beste forsvara og målvaktene i ligaen. Det pregar kampen. I tillegg har begge laga rotete forsvarsspel. Vi har problem med å få disipling og strukturen til å sitte i angrepet vårt i periodar, seier Kjelling.

ØIF Arendal brente i tillegg fem straffekast i første omgang. Det stod 7-5 til sørlendingane til pause.

– Vi bommar på seks straffer til slutt. Kanskje vi bør bruke neste trening til å skyte straffer. Slik skal ikkje skje, seier kaptein Eirik Heia Pedersen.

Løfta seg mot slutten

Litt betre underhaldning fekk publikum i andre omgang. Midtvegs skruddde ØIF opp tempo og opparbeidde seg ei luke på 4-5 mål som dei heldt ut omgangen.

Dermed tok arendalittane to viktige poeng i kampen om seriegullet.

Sidan Haslum slo Viking i Stavanger har ØIF Arendal framleis fem poeng luke ned til bærumsklubben på andreplass.