– Vi har nesten ingen som scorar mål. Men ting skal stemme for oss. Vi må få ja frå klubb, spelar og agent. Det er ein evigvarande prosess som har gått heilt frå førre overgangsvindauge, seier Sandstø til NRK.
Klubben har berre scora elleve mål på dei ti første kampane i årets 1. divisjon.
Laget ligg nest sist på tabellen. Laurdag vart det tap mot Start på Sør Arena.
Sjå intervju med Jerv-trenaren etter tapet mot Start.
– Alt for dårleg
På spørsmål om han vil hente inn ein spiss i sommar, svarar han kontant:
– Ja.
– Så det vil komme?
– Det vil tida vise, seier han.
Trenaren trur Jerv i beste fall kan komme blant dei seks beste i årets 1. divisjon. For å klare det, meiner han at klubben må hente ein ny spiss.
Per Gunnar Topland er styreleiar i FK Jerv.
Foto: Odd Rømteland / NRK– Toppscorarane våre har to mål. Det er alt for dårleg med tanke på kor mykje vi skapar. Skal vi ha ambisjon om å vere på øvre halvdel, så må vi ha nokon som scorar tosifra mengd mål. Det har vi ikkje no, seier Sandstø.
Lovar ikkje ny spiss
Styreleiar i FK Jerv, Per Gunnar Topland, vil ikkje love trenaren handel til sommaren.
– Eg lovar ingenting. Det har vi ikkje diskutert. Det må vi ta på kammerset, seier han.
– Har de økonomi til å hente ein ny spiss?
– Vi er ein liten klubb og lever med små ressursar. Vi har ein spelarstall vi har tru på og trur framleis det er godt nok. Det er ei stund til vindauget opnar, så kva som skjer då er for tidleg å seie, seier Topland.
Sjå intervju med Jervs Christopher MacConnacher etter tapet mot Start.
